PULMONET

Organet kryesore të sistemit të frymëmarrjes, në të cilat bëhet shkëmbimi i gazrave ku hyjnë oksigjeni dhe del dyoksidi i karbonit. Ndodhen në zgavrën e kraharorit. Janë dy: mushkëria e djathtë (pulmo dexter) dhe mushkëria e majtë (pulmo sinister). Secila mushkëri, me anë të brazdave interlobare, ndahet në lobe; mushkëria e majtë ka dy lobe: atë të sipërm dhe të poshtëm, ndërsa e djathta ka tre lobe: lobin e sipërm, të mesmin dhe të poshtmin. Secila mushkëri ka formën e një koni, ku dallojmë tri faqe: faqja diafragmatike ose baza, faqja brinjore dhe faqja mediale, dhe tri buzë: buza e përparme, e prapme dhe buza e poshtme.